mércores, 30 de setembro de 2020

O xoves 1 de outubro comezan as actividades extraescolares

O xoves 1 de outubro comezan as actividades extraescolares. Toda a información leva semanas publicada no blogue, pero a modo de resumo e para resaltar os puntos máis importantes.

Información das actividades (materiais específicos, horarios de entrada e saída, zonas, etc.)
https://drive.google.com/file/d/1PSMG6_jeuSIzE3JucT7_6o00qP-g7gHr/view?usp=sharing

Resumen de zonas e horarios de cada actividade
https://drive.google.com/file/d/1iMyY5K19f6364wFdVzlGDi9u0K3PIknZ/view?usp=sharing

Protocolos e información COVID
https://milnenosgalego.blogspot.com/p/covid.html

Os adultos non poderán entrar nos patios nin as instalacións. Salvo as entradas de infantil do colexio azul, onde un único adulto poderá acompañar ao alumno ata a porta do patio cuberto.

Este ano esíxese PUNTUALIDADE EXTREMA. A falta de puntualidade reiterada poderá ser motivo de expulsión das actividades.

Obrigatorio o uso de máscara en todas as actividades. Ademais deberán levar unha segunda máscara de reposto.

Prestade atención aos HORARIOS e ZONAS das actividades. Moitas veces os nenos non saben a que actividades van (algúns adultos que os acompañan tampouco). Unha boa medida é facerlle un cadro en papel con todos os días da semana e as actividades, para que o poida ensinar a calquera monitor e así axudalos de forma inmediata.

Estamos bastante saturados coa loxística este ano e as numerosas consultas recibidas. Agradecémosvos consultar o blogue antes de lanzar preguntas por correo, porque aí está toda a información publicada.

Por último pedímosvos que nos axudedes co traballo e responsabilidade compartida que implica ser dos poucos colexios que se animou este ano a arrincar todo. É unha enorme responsabilidade que nos implica a todos os participantes, non só á directiva: colaborar e non entorpecer, se vedes un problema axudade a solucionalo en lugar de provocar alarma social e coñecede e cumpride as normas establecidas.

sábado, 26 de setembro de 2020

Carreira ENKI

Como sabedes o ano pasado participamos un grupo moi numeroso de nais e pais cos nosos fillos na cerrera ENKI, foi unha xornada única e irrepetible que nos axudou a entender un pouco máis a inclusión e a divertirnos cos nosos fillos.

Este ano tamén queremos estar representados como colexio, aínda que nesta edición e como non podía ser doutro xeito adaptada á nova realidade, a través dun evento virtual. Aínda que non se poida participar dun modo presencial, gustaríanos animarvos a participar sendo parte do equipo virtual do colexio. É moi sinxelo, detallámosvos os pasos para seguir:

  • Inscribe aos membros da túa familia en www.enkiproyecto.com
  • No nome do equipo indica: OS PIRATAS DO EMILIA
  • Lembrar o custo por participante son 3 euros e coa inscrición recibiredes un dorsal de participación e de agasallo unha bolsa de corredor con moitas sorpresas.
  • Dispoñemos de vídeos titoriais para recrear os obstáculos en casa, pódense subir fotos á web de ENKI e gañar premios nunha festa en directo o sábado 19 de outubro

Destinarase o 100% da recadación ás entidades sociais que conforman ENKI 2020, e que nestes tempos tan complicados necesitan máis que nunca o apoio de todos.

Moitas grazas e imos tentar ser máis que o ano pasado!!

mércores, 23 de setembro de 2020

Cambios na actividade de fútbol

Debido ao baixo número de rexistrados en fútbol, e despois de máis dunha semana tentando unha solución por parte do Club Deportivo, informámosvos que finalmente a actividade sae adiante coas seguintes consideracións:

  • Os tres grupos de fútbol (prebenxamín,  benxamín e alevín) unifícanse nun único con horario luns e xoves de 16:00 a 17:00. É o horario correspondente a  prebenxamín, dado que é o grupo que ten máis preinscricións.
  • O prezo da actividade sobe a 20 euros ao mes

As familias afectadas teñen correo informativo máis detallado.

luns, 21 de setembro de 2020

Cancelación de baile urbano primaria

Cancélase baile urbano por varias baixas que afectan á viabilidade da actividade, que xa arrincaba moi xusta con 8 rexistrados.

sábado, 19 de setembro de 2020

Confirmacións das actividades inscritas

O día 16 de setembro xa foron confirmadas todas as actividades que arrincan, así como notificadas todas as familias das actividades canceladas.

A única actividade pendente de confirmación de inscrición é fútbol. Estamos á espera de solución final por parte do  Club Deportivo Os Rosales (unificar, aumentar o prezo ou cancelar a actividade) debido ao baixo número de rexistrados. Esperamos ter confirmación canto antes.

Toda a información no apartado de actividades.

martes, 15 de setembro de 2020

Actividade de piscina

O Concello este ano non oferta a actividade de Piscina.

Accións e reclamacións á Consellería de Educación

Informamos que a folga prevista para o día 16 trasládase ao día 23 coincidindo co comenzo do curso na ESO.

Para o mércores 16 de setembro ás 19 horas, hai convocadas mobilizacións en diferentes puntos de todas as provincias a prol dunha volta segura ás aulas.

Sobra dicir que é moi importante ter en conta:

  • Respectar ás medidas de seguridade: distancia social de seguridade, máscaras.
  • As familias dos Concellos que teñen limitadas as reunións a 10 persoas, poden acudir ás mobilizacións; único requisito, concentracións en grupos de 10 persoas (pode haber 1000 persoas, agrupadas en 100 grupos de 10, por exemplo).
Queremos facervos partícipes, ademais, da iniciativa promovida por distintas ANPA de Secundaria da Coruña e área metropolitana que teñen serios problemas de espazo nas aulas e están a verse abocadas a rateos esaxeradas, desdobres en quendas de mañá e tarde e mamparas para separar ao alumnado. Situación por suposto que tamén están a vivir moitas outras ANPA e familias da provincia. Trátase de facer unha cadea de familias (alumnado/pais/nais) ás portas do respectivo IES, desde mañá e ata o inicio de curso, todos os días ás 19:00 da tarde, en sinal de protesta mentres non se articule unha solución axeitada para os nosos IES ateigados de estudantes. Comezarán mañá mesmo!
 
ESIXIMOS: ENSINO PRESENCIAL, REDUCIÓN DE RATIO, AUMENTO DE PROFESORADO, E POR SUPOSTO AS REIVINDICACIÓNS QUE SINALAMOS NO COMUNICADO DE CONFAPA.
 
NA DEFENSA DO ENSINO PÚBLICO. NIN UN PASO ATRÁS!!!

Comunicado CONFAPA de apoio á folga do profesorado en contra da improvisación

 


 

luns, 14 de setembro de 2020

Nova apertura de inscricións a comedor

Están abertas as inscricións de comedor para outubro. Recordamos que o último día para que sexan válidas será o 26 de setembro.

mércores, 9 de setembro de 2020

Información sobre o acceso ao local do ANPA

Debido ás medidas levadas a cabo polo CEIP en canto á presenza de pais e nais no centro, vese afectado o funcionamento da atención presencial no local da ANPA.

Atenderase no devandito local ás familias os mércores de 17 h a 18 h e os xoves de 9:30 h a 10:30 h CON CITA PREVIA e acceso a través do portalón do aulario de E. Infantil.

Para pedir cita, basta con enviar un e-mail polo menos 24 horas antes a milnenos@gmail.com indicando o día de preferencia. O aforo dentro do local é de dúas persoas: un membro da directiva e un proxenitor.

luns, 7 de setembro de 2020

Información actualizada sobre comedor e madrugadores

Actualizamos no apartado correspondente do blogue a información sobre madrugadores e comedor neste curso 2020/21.

Lembrámosvos que as inscricións para setembro están pechadas. En breve poñeremos neste blogue a información sobre as ampliacións de prazas para outubro, en función dos cambios nos protocolos das consellerías e as imposicións derivadas destas.

martes, 1 de setembro de 2020

Información do ritmo de preinscricións por actividade

Recordamos que no curso 2020/2021 as actividades comezarán o 1 de outubro.

Na seguinte ligazón poderedes consultar o ritmo de preinscricións que iremos actualizando diariamente (esperemos)

Información do ritmo de preinscricións por actividade

Seguir por correo electrónico